कोल्हापूर: कोल्हापूरच्या एमआयडीसी परिसरातील कंपन्यांना लक्ष्य करून कार्हाईड इन्सर्ट आणि इतर मौल्यवान साहित्याची चोरी करणाऱ्या टोळीला स्थानिक गुन्हे अन्वेषण शाखेने जेरबंद केले आहे. या कारवाईत दोन आरोपींना अटक करण्यात आली असून, त्यांच्याकडून २५ लाख ३६ हजार ७२३ रुपये किमतीचा मुद्देमाल हस्तगत करण्यात आला आहे. या कामगिरीमुळे तीन चोरीचे गुन्हे उघडकीस आले आहेत.

दिनांक ५ ते ६ जून २०२६ दरम्यान शिरोली एमआयडीसीमधील 'स्काय टेक्नोव्हिजन' आणि 'एस.व्ही. इंजिनिअरिंग सोल्युशन' या कंपन्यांच्या शटरचे कुलूप तोडून अज्ञात चोरट्यांनी कार्हाईड इन्सर्ट, टुल्स आणि डीव्हीआर चोरून नेले होते. या घटनेनंतर पोलीस अधीक्षक नीलोत्पल यांच्या मार्गदर्शनाखाली स्थानिक गुन्हे अन्वेषण शाखेने तपासाची चक्रे फिरवली. गोपनीय बातमीदारांमार्फत मिळालेल्या माहितीनुसार, आरोपी चोरीचा माल एका मालवाहू वाहनातून नेत असताना त्यांना किणी, ता. हातकणंगले येथे सापळा रचून पकडण्यात आले.

विजय विलास गोसावी आणि राहुल शिवाजी गोसावी अशी अटक केलेल्या आरोपींची नावे आहेत. आरोपींनी आपल्या साथीदारांसह गुन्ह्यांची कबुली दिली असून, पोलीस पुढील तपास करत आहेत. ही धडाकेबाज कारवाई पोलीस अधीक्षक नीलोत्पल, अपर पोलीस अधीक्षक अण्णासाहेब जाधव आणि उपविभागीय पोलीस अधिकारी सुजितकुमार क्षीरसागर यांच्या मार्गदर्शनाखाली पोलीस निरीक्षक सुशांत चव्हाण, उपनिरीक्षक जालिंदर जाधव आणि त्यांच्या पथकाने केली आहे. या टोळीच्या अटकेमुळे एमआयडीसी परिसरातील उद्योजकांना मोठा दिलासा मिळाला आहे.