नवी दिल्ली :  केंद्रीय मंत्रिमंडळाने बुधवारी केंद्र सरकारी कर्मचारी आणि निवृत्तीवेतनधारकांसाठी महागाई भत्त्यात (डीए) ३ टक्के वाढ करण्यास मान्यता दिली. महागाई भत्त्यात वाढ सातव्या वेतन आयोगाच्या अंतर्गत येणाऱ्या सर्व केंद्रीय सरकारी कर्मचाऱ्यांना तसेच निवृत्तीवेतनधारक आणि कुटुंब निवृत्तीवेतनधारकांना लागू होईल. 

केंद्रीय मंत्रिमंडळाने बुधवारी केंद्र सरकारी कर्मचारी आणि निवृत्तीवेतनधारकांसाठी महागाई भत्त्यात (डीए) ३ टक्के वाढ करण्यास मान्यता दिली. दसरा आणि दिवाळीसारख्या सणांच्या आधी ही वाढ करण्यात आली आहे. केंद्रीय मंत्री अश्विनी वैष्णव यांनी मंत्रिमंडळाच्या निर्णयांची माहिती दिली. 

माहिती आणि प्रसारण मंत्री अश्विनी वैष्णव यांनी सांगितले की, मंत्रिमंडळाने ४९.२ लाख केंद्रीय कर्मचारी आणि ६८.७ लाख निवृत्तीवेतनधारकांना लाभ देण्यासाठी डीए/डीआरमध्ये ३ टक्के वाढ करण्यास मान्यता दिली आहे.

यासह, हा दर मूळ वेतन आणि पेन्शनच्या ५५ ​​टक्क्यांवरून ५८ टक्के झाला आहे. ही वाढ १ जुलै २०२५ पासून लागू होईल. जुलै, ऑगस्ट आणि सप्टेंबर महिन्याची थकबाकी दिवाळीच्या अगदी आधी ऑक्टोबरच्या पगारासह दिली जाईल.

डीए आणि डीआरमध्ये वाढ केल्याने सरकारी तिजोरीवर दरवर्षी एकूण १०,०८३.९६ कोटी रुपयांचा बोजा पडेल. ही वाढ ७ व्या केंद्रीय वेतन आयोगाच्या शिफारशींवर आधारित मंजूर सूत्रानुसार आहे. महागाई भत्त्यात वाढ केल्याने केंद्रीय कर्मचाऱ्यांना सणासुदीच्या काळात दिलासा मिळेल.