शाहूवाडी : शाहूवाडी तालुक्यातील ससेगाव येथे जनसुराज्य शक्ती पक्षाचे संस्थापक अध्यक्ष आणि आमदार डॉ. विनय कोरे (सावकर) यांच्या हस्ते एकूण २५ लाख रुपयांच्या विविध विकासकामांचे उद्घाटन उत्साहात पार पडले. यामध्ये गोसावी वस्तीसाठी सांस्कृतिक हॉल आणि विद्यामंदिर ससेगाव येथील शाळा खोलीच्या बांधकामाचा समावेश आहे.

ससेगावच्या विकासासाठी आमदार कोरे यांनी भरीव निधी उपलब्ध करून दिला आहे. यामध्ये गोसावी वस्तीत सामाजिक व सांस्कृतिक कार्यक्रमांसाठी हक्काची जागा उपलब्ध व्हावी, या उद्देशाने १५ लाख रुपये खर्चून सांस्कृतिक हॉल बांधण्यात येणार आहे. तसेच, विद्यार्थ्यांच्या शैक्षणिक सुविधेसाठी विद्यामंदिर ससेगाव येथे १० लाख रुपये निधीतून नवीन वर्ग खोलीचे बांधकाम करण्यात येणार आहे. या कामांमुळे ग्रामस्थांमध्ये आनंदाचे वातावरण आहे.

या कार्यक्रमाप्रसंगी कोल्हापूर जिल्हा परिषदेचे जनसुराज्य शक्तीचे गटनेते सर्जेराव दादा पाटील (पेरीडकर), शाहूवाडी पंचायत समितीचे उपसभापती अमरसिंह खोत, संजय गांधी निराधार समितीचे अध्यक्ष रंगराव खोपडे, आणि युवा नेते युवराज काटकर यांची प्रमुख उपस्थिती होती. ससेगावच्या सर्वांगीण विकासासाठी कटिबद्ध असल्याचे आश्वासन यावेळी मान्यवरांनी दिले.

तसेच, ससेगावच्या सरपंच वनिता पारळे, उपसरपंच पांडुरंग पाटील, माजी सरपंच अशोक गोसावी, वसंत गोसावी यांच्यासह शाळा व्यवस्थापन समितीच्या अध्यक्षा सुनिता गोसावी, उपाध्यक्षा प्रियांका पारळे आणि शाहूवाडी तालुका गोसावी समाज अध्यक्ष भरत गोसावी उपस्थित होते.

कार्यक्रमाला ग्रामपंचायत सदस्य बाळाबाई गोसावी, सुनंदा पाटील, सविता सुतार, शिवाजी सुतार यांच्यासह गावातील प्रमुख मान्यवर, युवक आणि ग्रामस्थ मोठ्या संख्येने उपस्थित होते.