कोल्हापूर : भिवंडी येथील सबजेलमधून बाथरूमचे ग्रील उचकटून पसार झालेल्या आणि तब्बल ३१ पेक्षा जास्त गंभीर गुन्हे दाखल असलेल्या रॅकेटमधील अट्टल गुन्हेगाराला कोल्हापूर स्थानिक गुन्हे अन्वेषण शाखेने (LCB) शिताफीने अटक केली. रविंद्र धनाजी भोसले (वय २४, रा. नारपोली, भिवंडी) असे या अटक केलेल्या सराईत आरोपीचे नाव आहे.

आरोपी रविंद्र भोसले याच्यावर जबरी चोरी आणि घरफोडीचे गंभीर गुन्हे दाखल आहेत. दि. १५ फेब्रुवारी २०२६ रोजी भिवंडी सबजेलमध्ये असताना, त्याने बाथरूमच्या खिडकीचे ग्रील तोडून पलायन केले होते. याप्रकरणी शांतीनगर पोलीस ठाण्यात गुन्हा दाखल झाला होता. यापूर्वीही त्याने रेल्वे पोलिसांच्या ताब्यातून पलायन केल्याचा इतिहास असल्याने संपूर्ण महाराष्ट्रात सतर्कतेचा इशारा देण्यात आला होता.

कोल्हापूरचे पोलीस अधीक्षक  योगेशकुमार  यांच्या मार्गदर्शनाखाली जिल्ह्यात नाकाबंदी आणि कोबिंग ऑपरेशन राबवले जात होते. यावेळी स्थानिक गुन्हे अन्वेषण शाखेचे पोलीस निरीक्षक सुशांत चव्हाण व त्यांच्या पथकाला आरोपी शिवाजी पुलाजवळील पंचगंगा घाटावर असल्याची गोपनीय माहिती मिळाली. पीएसआय आतिश म्हेत्रे व पथकाने तातडीने सापळा रचून त्याला ताब्यात घेतले. 

 ३१ गुन्हे दाखल असलेला हा अट्टल गुन्हेगार कोल्हापूर पोलिसांच्या सतर्कतेमुळे पुन्हा गजाआड झाला आहे. पुढील कारवाईसाठी त्याला शांतीनगर (ठाणे) पोलिसांच्या स्वाधीन करण्यात आले आहे.