जयसिंगपूर :  लहान वयातच मुलांमध्ये शिक्षणाची आवड निर्माण होणे आवश्यक असून, बालशिक्षणाचा पाया मजबूत करण्यासाठी शासनाकडून विशेष पुढाकार घेतला जात आहे. शिरोळ तालुक्यातील प्रत्येक मुलाला दर्जेदार शिक्षण मिळावे, यासाठी सातत्याने प्रयत्न सुरू आहेत. विद्यार्थ्यांच्या सर्वांगीण विकासासाठी यापुढेही निधीची कमतरता भासू दिली जाणार नाही, अशी ग्वाही आमदार राजेंद्र पाटील यड्रावकर यांनी दिली.

चिपरी येथे ११ लाख २४ हजार रुपयांच्या निधीतून उभारण्यात आलेल्या अंगणवाडी क्रमांक ३५९ च्या नूतन इमारतीचा उद्घाटन सोहळा आमदार राजेंद्र पाटील यड्रावकर यांच्या हस्ते उत्साहात पार पडला. यावेळी ते बोलत होते.

बालवय हा मुलांच्या आयुष्यातील जडणघडणीचा महत्त्वाचा टप्पा असतो. याच काळात मुलांच्या बौद्धिक, शारीरिक आणि सामाजिक विकासाचा पाया घातला जातो. त्यामुळे अंगणवाड्यांमध्ये मुलांना पोषक वातावरण, आवश्यक शैक्षणिक सुविधा आणि दर्जेदार शिक्षण मिळणे गरजेचे आहे. ग्रामीण भागातील बालकांनाही शहरातील मुलांप्रमाणे चांगल्या सुविधा उपलब्ध व्हाव्यात, या उद्देशाने शासन विविध विकासकामांना प्राधान्य देत आहे.
नवीन अंगणवाडी इमारतीमुळे चिपरी येथील लहान बालकांना शिक्षण आणि पूर्वप्राथमिक संस्कारांसाठी हक्काची, सुरक्षित व सुविधायुक्त जागा उपलब्ध झाली आहे. अंगणवाडीच्या माध्यमातून बालकांच्या शिक्षणाबरोबरच त्यांच्या आरोग्य आणि पोषणाकडेही लक्ष दिले जाणार असल्याचे आमदार यड्रावकर यांनी यावेळी बोलताना सांगितले.

या उद्घाटनप्रसंगी जिल्हा परिषद सदस्या प्रचिता कोळी, माजी उपसरपंच अभय पाटील, माजी सरपंच शिवाजी बेडगे, बाळासाहेब पाटील, सुजित बेडगे, म्हाळू गावडे, रामा गावडे, दीपिका परीट, प्रशासक अनिल ओमासे, ग्रामविकास अधिकारी कोळी यांच्यासह ग्रामपंचायत सदस्य, अंगणवाडी सेविका आणि ग्रामस्थ मोठ्या संख्येने उपस्थित होते.