कोल्हापूर: 'जय भवानी... जय शिवराय...'च्या अखंड जयघोषात आणि ऐतिहासिक वातावरणात शिवराष्ट्र परिवार आयोजित पन्हाळगड–पावनखिंड प्रेरणायात्रेला अत्यंत उत्साहपूर्ण वातावरणात प्रारंभ झाला. छत्रपती शिवाजी महाराजांच्या पराक्रमाचा इतिहास अनुभवण्यासाठी आणि स्वराज्याच्या प्रेरणादायी वारशाला मानवंदना देण्यासाठी राज्यभरातून ५०० हून अधिक शिवभक्त या मोहिमेत सहभागी झाले आहेत.

मोहिमेच्या सुरुवातीला वीर बाजीप्रभू देशपांडे आणि वीर शिवा काशिद यांच्या पुतळ्यांचे पूजन करून त्यांना अभिवादन करण्यात आले. मोहिमेचे नेतृत्व राजेंद्र पोवार आणि भूपाल शेळके करत आहेत. दरम्यान, खोतवाडी येथील मुक्कामाच्या ठिकाणी शिवव्याख्याते दीपकराव करपे यांनी पन्हाळगड-पावनखिंड रणसंग्रामाचा इतिहास अत्यंत प्रभावीपणे उलगडून दाखवला. त्यांच्या ओघवत्या शैलीतील व्याख्यानामुळे शिवभक्तांना जणू काही आपण शिवकाळातच आहोत, असा अनुभव आला.

शिवप्रेम आणि राष्ट्रभक्तीची भावना रुजवण्याच्या उद्देशाने राबवण्यात आलेल्या या मोहिमेला सर्व वयोगटातील नागरिकांचा उत्स्फूर्त प्रतिसाद मिळाला आहे. पदभ्रमंती आणि व्याख्यानांच्या माध्यमातून शौर्य, त्याग व स्वराज्याचा इतिहास नव्या पिढीपर्यंत पोहोचवण्याचा हा एक स्तुत्य प्रयत्न ठरला आहे. या ऐतिहासिक मोहिमेत सहभागी झाल्यामुळे संपूर्ण परिसर शिवमय वातावरणाने दुमदुमून गेला असून, शिवभक्तांमध्ये मोठा उत्साह दिसून येत आहे.