कोल्हापूर  : सध्या सायबर गुन्ह्यांमध्ये आरोपी विविध व्यक्तींची बँक खाती फसवणुकीकरीता भाड्याने, कमिशनवर किंवा अन्य मार्गांनी प्राप्त करून घेत आहेत. फसवणुकीची रक्कम या बँक खात्यांमध्ये वळती करून ती नेट बँकिंगद्वारे इतर खात्यांत हस्तांतरित करणे, रोख काढणे किंवा क्रिप्टो करन्सीत रूपांतरित करण्याचे प्रकार सुरू असतात. हे सायबर गुन्हे रोखण्यासाठी म्युल बँक खाती उपलब्ध होऊ न देणे हा एक मास्टर स्ट्रोक ठरणार असून, त्या अनुषंगाने कोल्हापूरचे पोलीस अधीक्षक नीलोत्पल यांनी जिल्ह्यात विशेष मोहीम राबवून अशा टोळीविरोधात कडक कायदेशीर कारवाईचे आदेश दिले होते. 

पोलीस अधीक्षक आणि अपर पोलीस अधीक्षक यांच्या मार्गदर्शनाखाली सायबर पोलीस ठाण्याचे पोलीस निरीक्षक संजय हारुगडे यांनी तांत्रिक कौशल्याच्या आधारे माहिती मिळवली.

या माहितीच्या आधारे शाहूपुरी, चौथी गल्ली येथील स्वस्तिक प्लाझा मधील 'टोरकोलाईन पॉवर टूल्स प्रा. लि.' या कंपनीच्या ऑफिसवर छापा टाकला असता तिथे तीन इसम मिळून आले. नितीश कुमार (रा. रोहतक, हरयाणा), अनुप यादव (रा. बेहरोड, राजस्थान) आणि अमित यादव (रा. मेंद्रगढ, हरियाणा) अशी त्यांची नावे असून त्यांनी साथीदार करमवीर उर्फ विजेंद्र सिंह याच्यासह भारत सरकारच्या उद्यम रजिस्ट्रेशनवर नोंदणी करून शेल कंपनी स्थापन केली होती. कोल्हापूर परिसरातील विविध बँकांमध्ये कंपनीच्या नावे चालू (करंट) खाती काढून त्यामध्ये सायबर फ्रॉडमधील जमा होणाऱ्या रकमेत टक्केवारीनुसार हिस्सा वाटून घेत असल्याचे निष्पन्न झाले.

कारवाई दरम्यान पोलिसांनी १४ बँक चेकबुक्स, १० क्युआर कोड, २ क्युआर कोड मशिन, ७ डेबिट कार्ड्स, १ लॅपटॉप, ४ मोबाईल हँडसेट्स, महिंद्रा स्कॉर्पिओ गाडी आणि कागदपत्रे असा एकूण अंदाजे २१ लाख रुपयांचा मुद्देमाल जप्त केला आहे. या प्रकरणी शाहूपुरी पोलीस ठाण्यात भारतीय न्याय संहितेच्या (BNS) कलमांनुसार गुन्हा नोंदवण्यात आला असून इतर फरार आरोपींचा शोध सुरू आहे. कोल्हापूर सायबर पोलिसांनी नागरिकांना आवाहन केले आहे की, बँक खाते भाड्याने देण्यासाठी किंवा हस्तांतरित करण्यासाठी कोणी प्रलोभन दाखवल्यास कोणत्याही अमिषाला बळी पडू नये.