वारणानगर : वारणा विद्यापीठ, वारणानगर येथे यशवंतराव चव्हाण वारणा महाविद्यालय आणि तात्यासाहेब कोरे इन्स्टिट्यूट ऑफ इंजीनियरिंग अँड टेक्नॉलॉजी, वारणानगर यांच्या संयुक्त विद्यमाने ‘भौगोलिक माहिती प्रणाली’ (GIS) या विषयावरील एक आठवड्याच्या प्रशिक्षण शिबिराचे उद्घाटन करण्यात आले.

आजच्या बदलत्या तंत्रज्ञान युगात विद्यार्थी, संशोधक आणि प्राध्यापक यांनी भौगोलिक माहिती प्रणाली या तंत्रज्ञानाची कौशल्ये आत्मसात करणे अत्यावश्यक आहे, असे प्रतिपादन वारणा विद्यापीठाचे मा. कुलगुरू प्रा. डॉ. डी. टी. शिर्के यांनी उद्घाटनप्रसंगी केले. 

या प्रशिक्षण शिबिराच्या माध्यमातून भविष्यात अनेक उपयोजित माहितीचे विश्लेषण करणारे नकाशे तयार होतील, अशी अपेक्षाही त्यांनी यावेळी व्यक्त केली.

कार्यशाळेचे मुख्य विषयतज्ज्ञ म्हणून शिवाजी विद्यापीठ, कोल्हापूरच्या भूगोल विभागाचे डॉ. अभिजीत पाटील उपस्थित होते. त्यांनी पहिल्या सत्रात जीआयएस (GIS) ची संकल्पना व संशोधनातील महत्त्व अत्यंत सोप्या भाषेत स्पष्ट केले. आधुनिक काळात या तंत्रज्ञानाचा वापर कसा प्रभावीपणे करता येऊ शकतो, यावर त्यांनी प्रकाश टाकला.

यासाठी श्री वारणा विविध उद्योग व शिक्षण समूहाचे अध्यक्ष, डॉ. विनयरावजी कोरे, वारणा विद्यापीठाचे कुलाधिकारी, एन. एच. पाटील व श्री वारणा विभाग शिक्षण मंडळाचे मुख्य कार्यकारी अधिकारी, डॉ. व्ही. व्ही. कारजिनी यांचे मार्गदर्शन लाभले.

कार्यक्रमप्रसंगी भूगोल विभागाचे प्रमुख प्रा. डॉ. पी. एस. राऊत यांनी उपस्थित मान्यवरांचे स्वागत व प्रास्ताविक केले. वारणा विद्यापीठाचे प्रभारी कुलसचिव डॉ. आर. बी. पाटील यांनी आभार व्यक्त केले. सूत्रसंचालन डॉ. एस. जी. जांभळे यांनी केले.

या कार्यशाळेसाठी महाविद्यालयातील प्राध्यापक, संशोधक आणि विद्यार्थी मोठ्या संख्येने उपस्थित होते.