कोल्हापूर : महिलांच्या कौशल्याला व्यवसायाची जोड मिळावी आणि मार्केटिंग व विक्री क्षेत्रातील आवश्यक कौशल्यांची माहिती मिळावी, या उद्देशाने शिवाजी विद्यापीठाचे कौशल्य व उद्योजकता विकास केंद्र आणि इंडो काउंट फाऊंडेशन अंतर्गत महालक्ष्मी कौशल्य विकास केंद्र, गोकुळ शिरगाव यांच्या संयुक्त विद्यमाने ‘मार्केटिंग व विक्री कौशल्य’ या विषयावर एकदिवसीय कार्यशाळेचे आयोजन करण्यात आले आहे. शिक्षणशास्त्र अधिविभागाच्या सभागृहात येत्या सोमवारी (दि. ५) सकाळी १० वाजता ही कार्यशाळा होणार आहे.

विद्यापीठाचे जनसंपर्क अधिकारी डॉ. आलोक जत्राटकर, इंडो काउंटचे सल्लागार प्रफुल्ल रंगारी आणि उमेदचे जिल्हा व्यवस्थापक दयानंद पाटील प्रमुख पाहुणे म्हणून उपस्थित राहणार आहेत. व्यावसायिक मार्गदर्शक रविंद्र खैरे आणि जिल्हा ग्रामोद्योग अधिकारी श्रीकांत जौंजाळ प्रमुख मार्गदर्शक असतील. कौशल्य व उद्योजकता विकास केंद्राचे समन्वयक डॉ. रामचंद्र पवार हे अध्यक्षस्थानी असतील. कार्यक्रमाला प्रमोद कांबळे, ईश्वर पुजारी उपस्थित असतील.

महिलांना कौशल्य विकासाच्या माध्यमातून उद्योग व व्यवसायाच्या संधींची माहिती मिळावी, तसेच मार्केटिंग आणि विक्री कौशल्यांचा व्यावहारिक दृष्टिकोन विकसित व्हावा, यासाठी या कार्यशाळेचे आयोजन करण्यात आले आहे. महिला प्रशिक्षणार्थी, व्यवसायाची सुरुवात करू इच्छिणाऱ्या महिला तसेच कौशल्यविकासात रुची असणाऱ्यांसाठी ही कार्यशाळा उपयुक्त ठरेल, अशी आशा केंद्राचे समन्वयक डॉ. रामचंद्र पवार यांनी व्यक्त केली.