कोल्हापूर:कोल्हापूर जिल्हा दूध उत्पादक संघ अर्थात 'गोकुळ' च्या निवडणुकीच्या पार्श्वभूमीवर आमदार सतेज पाटील यांनी पत्रकार परिषदेत आपली भूमिका स्पष्ट केली आहे. गोकुळची मुदत संपल्यानंतर लोकशाही मार्गाने निवडणूक होणे आवश्यक असताना, प्रशासक नेमून ही प्रक्रिया जाणीवपूर्वक लांबणीवर टाकली जात असल्याचा आरोप त्यांनी यावेळी केला. गेल्या काही महिन्यांपासून निवडणूक लांबणीवर टाकण्याचे प्रयत्न सुरू होते आणि आता प्रशासकाची नियुक्ती करून सहकार क्षेत्रातील लोकशाहीला हरताळ फासला जात असल्याचे त्यांनी नमूद केले.

आमदार सतेज पाटील यांनी पुढे सांगितले की, प्रशासनाने ७० ते ७५ दिवसांच्या आत ऑडिट आणि इतर तांत्रिक सुनावणी पूर्ण करून निवडणूक घेण्याचे प्रतिज्ञापत्र दिले आहे. त्यामुळे या मुदतीतच सर्व प्रक्रिया पूर्ण करून पावसाळा सुरू होण्यापूर्वी निवडणूक पार पाडावी, अशी आमची ठाम मागणी आहे. 
कोविड काळातील नियमांचा आधार घेऊन प्रशासक नेमणे हे दूध उत्पादक सभासदांच्या हिताचे नसून, प्रशासनाने तातडीने ठराव मागवण्याची प्रक्रिया सुरू करावी, असेही त्यांनी स्पष्ट केले.