कोल्हापूर : कोल्हापूर महानगरपालिकेचा अधिकृत व्यवसाय परवाना न घेता व्यवसाय करणाऱ्या तसेच परवाना मिळविण्यासाठी आवश्यक अर्ज दाखल न केलेल्या व्यवसायधारकांवर महापालिकेच्या परवाना विभाग, घरफाळा विभाग, विभागीय कार्यालय क्र. ४ (ताराराणी मार्केट) आणि उपद्रव शोध पथकाच्या माध्यमातून कारवाई करण्यात आली.

महालक्ष्मी चेंबर, स्टेशन रोड तसेच विचारे कॉम्प्लेक्स परिसरातील १०८ मिळकतींच्या सर्वेक्षणादरम्यान ५१ विनापरवाना व्यवसायधारकांना नोटिसा बजावण्यात आल्या. तसेच भाडेकरार सादर न करणाऱ्या २७ संबंधितांनाही नोटिसा देण्यात आल्या. या कारवाईदरम्यान महापालिका करांची थकबाकी असलेल्या व्यवसायधारकांकडून एकूण ३ लाख १० हजार रुपयांची थकबाकी वसूल करण्यात आली.

महापालिका क्षेत्रातील व्यवसायांची तपासणी करून व्यवसाय परवाना, घरफाळा तसेच अन्य महापालिका करांची पूर्तता झाली आहे किंवा नाही, याची पडताळणी करण्याची कार्यवाही सुरू आहे. विनापरवाना व्यवसाय करणाऱ्या तसेच महापालिका करांची थकबाकी असलेल्या व्यवसायधारकांवर नियमानुसार कारवाई करण्यात येत आहे.

ही कारवाई आयुक्त डॉ. राजेंद्र भारूड यांच्या नियंत्रणाखाली तसेच सहाय्यक आयुक्त डॉ. विजय पाटील आणि कर निर्धारक सुधाकर चलावड यांच्या मार्गदर्शनाखाली करण्यात आली.

कारवाईमध्ये परवाना अधीक्षक अशोक यादव, कर अधीक्षक अर्चना प्रभावळे, शिवाजी कोकरे यांच्यासह घरफाळा, परवाना, उपद्रव शोध पथक व विभागीय कार्यालय क्र. ४ मधील कर्मचारी सहभागी झाले होते.

महापालिका क्षेत्रातील सर्व व्यवसायधारकांनी नियमानुसार व्यवसाय परवाना घेऊनच व्यवसाय करावा तसेच घरफाळा व इतर महापालिका करांची थकबाकी वेळेत भरून महापालिकेस सहकार्य करावे, असे आवाहन कोल्हापूर महानगरपालिकेच्यावतीने करण्यात आले आहे.