कोल्हापूर  : कोल्हापूर जिल्ह्यात गेल्या काही दिवसांपासून पावसाची संततधार सुरू असल्याने जनजीवन विस्कळीत झाले आहे. पावसाच्या या तुफान माऱ्यामुळे पंचगंगा नदीच्या पाणी पातळीत वेगाने वाढ होत असून, ती आता २५ फुटांच्या धोकादायक पातळीवर पोहोचली आहे.

 नदीपात्रातील पाणी वाढल्याने जिल्ह्यातील तब्बल २० बंधारे पाण्याखाली गेले आहेत, ज्यामुळे अनेक मार्गांवरील वाहतूक ठप्प झाली आहे. हवामान विभागाने पुढील तीन दिवस पश्चिम महाराष्ट्रात अतिमुसळधार पावसाचा इशारा दिला असून, कोल्हापूर जिल्ह्यासाठी 'हाय अलर्ट' घोषित करण्यात आला आहे.

 या पार्श्वभूमीवर जिल्हा प्रशासनाने नदीकाठच्या वस्त्या व सखल भागातील नागरिकांना सतर्क राहण्याचे आवाहन केले आहे. तसेच, पाण्याखाली गेलेल्या बंधाऱ्यांवरून प्रवास टाळावा आणि आपत्ती व्यवस्थापन यंत्रणेच्या सूचनांचे पालन करावे, अशा स्पष्ट सूचना प्रशासनाकडून देण्यात आल्या आहेत.