कोल्हापूर : महाराष्ट्र शासनाचा उच्च व तंत्र शिक्षण विभाग आणि शिवाजी विद्यापीठ यांच्या संयुक्त विद्यमाने येत्या शुक्रवारी (दि. २० सप्टेंबर) ‘महिला सुरक्षितता व शिष्यवृत्ती’ या विषयावर एकदिवसीय विभागस्तरीय कार्यशाळेचे आयोजन करण्यात आले आहे. ही माहिती राज्याचे उच्च शिक्षण संचालक डॉ. शैलेंद्र देवळाणकर आणि कुलसचिव डॉ. विलास शिंदे यांनी दिली आहे.
शिवाजी विद्यापीठाच्या राजर्षी शाहू (सिनेट) सभागृहात कुलगुरू डॉ. दिगंबर शिर्के यांच्या हस्ते सकाळी १० वाजता कार्यशाळेचे उद्घाटन होईल.
या समारंभास कोल्हापूरचे जिल्हाधिकारी अमोल येडगे प्रमुख पाहुणे असतील, तर जिल्हा पोलिस प्रमुख डॉ. महेंद्र पंडित, कोल्हापूरचे विभागीय उच्चशिक्षण सहसंचालक डॉ. अशोक उबाळे प्रमुख उपस्थित असतील. दिवसभरातील विविध सत्रांत मान्यवरांचे मार्गदर्शन होईल. जिल्हाधिकारी श्री. येडगे हे ‘महिला सुरक्षा धोरण’, जिल्हा पोलिस प्रमुख डॉ. पंडित हे ‘संकटसमयी कोठून मदत घ्यावी?’, अॅड. ठोंबरे हे ‘महिला सुरक्षाविषयक कायदे’ आणि डॉ. उबाळे हे ‘राजर्षी शाहू शिष्यवृत्ती’ या विषयावर मार्गदर्शन करतील. या कार्यशाळेस विद्यापीठाशी संलग्नित सर्व महाविद्यालयांचे प्राचार्य, संस्थाचालक यांनी मोठ्या संख्येने उपस्थित राहावे, असे आवाहनही संचालक डॉ. देवळाणकर यांनी केले आहे.