कोल्हापूर : 'गणपती बाप्पा मोरया... 'चा जयघोष, पारंपरिक वाद्यांचा दणदणाट तसेच पारंपरिक वेशभूषेत अभूतपूर्व उत्साहात शनिवारी लाडक्या बाप्पाचे सर्वत्र आगमन झाले. अवघा कोल्हापूर जिल्हा गणपतीच्या आगमनाने मंगलमय झाला आहे.
कोल्हापुरात लाडक्या गणरायाचे स्वागत उत्साहात करण्यात आले. गंगावेस, पापाची तिकटी, शाहूपुरी कुंभार गल्ली, बापट कॅम्प, मार्केट यार्डातील कुंभार व्यावसायिकांच्या गणेशशाळांसह ठिकठिकाणी उभारलेल्या गणेशमूर्ती स्टॉल्सवर लोकांची गर्दी होती. सजवलेली वाहने, आतिषबाजी, 'गणपती बाप्पा मोरया' चा जयघोष, अशा उदंड उत्साहामध्ये सकाळपासून घरगुती गणपतींचे आगमन आणि प्रतिष्ठापना करण्यात आली.
दुपारनंतर सार्वजनिक तालीम संस्था-तरुण मंडळांच्या गणेश आगमन मिरवणुका पहावयास मिळाल्या. पारंपारिक वाद्य, साऊंड सिस्टिम, झांज पथक, मर्दानी खेळ, विद्युत रोषणाई अशा मंगलमय उत्साहपूर्ण वातावरणात गणेश आगमन मिरवणुका रात्री उशिरापर्यंत सुरू होत्या.
विशेष म्हणजे कोल्हापूरमध्ये गेल्या चार दिवसापासून शहरातील काही भागांमध्ये तरुण मंडळांच्या गणेश मूर्तींचे आगमन पूर्वीच मोठ्या उत्साहात झाले आहे. गणेश उत्सवाच्या पार्श्वभूमीवर कोल्हापुरातील कुंभार गल्ल्यांसह प्रमुख मार्ग व चौकाचौकांत मोठा पोलिस बंदोबस्त तैनात करण्यात आला आहे.