कोल्हापूर : ​शाहूवाडी विधानसभा मतदारसंघाच्या माजी आमदार तथा ज्येष्ठ नेत्या संजीवनीदेवी गायकवाड यांचे सोमवारी पहाटे निधन झाले. त्या गेल्या काही दिवसांपासून प्रकृतीच्या अस्वास्थ्यामुळे त्रस्त होत्या. त्यांच्या निधनाने कोल्हापूर जिल्ह्याच्या राजकीय वर्तुळात शोककळा पसरली आहे.

​संजीवनीदेवी गायकवाड या 'गोकुळ' दूध संघाचे माजी संचालक करणसिंह गायकवाड, जिल्हा परिषदेचे माजी सदस्य योगीराज गायकवाड आणि इंद्रजीत गायकवाड यांच्या मातोश्री, तर शाहूवाडीचे दिवंगत माजी आमदार संजयसिंह गायकवाड यांच्या पत्नी होत. त्यांचा जन्म शाहूवाडी तालुक्यातील सरुड येथील एका शेतकरी कुटुंबात झाला होता. संजयसिंह गायकवाड यांच्या पश्चात त्यांच्या राजकीय व सामाजिक कार्यात त्यांनी मोलाचा सहभाग दिला होता.
​पती संजयसिंह गायकवाड यांच्या निधनानंतर वर्ष २००० मध्ये झालेल्या शाहूवाडी विधानसभा पोटनिवडणुकीत काँग्रेस पक्षाने त्यांच्यावर विश्वास दाखवत उमेदवारी दिली. या निवडणुकीत दणदणीत विजय मिळवत त्यांनी सुमारे चार वर्षे विधानसभेत मतदारसंघाचे यशस्वी प्रतिनिधित्व केले. याशिवाय, 'गोकुळ' दूध संघामध्ये त्यांनी सलग १० वर्षे संचालिका म्हणून महत्त्वपूर्ण जबाबदारी पार पाडली होती.

​सोमवारी सकाळी ११ वाजता कोल्हापुरातील नागाळा पार्क येथील निवासस्थानावरून त्यांची अंत्ययात्रा काढण्यात आली. त्यानंतर जुना बुधवार पेठेतील गायकवाड वाड्यात अंत्यदर्शन ठेवण्यात आले होते. या ठिकाणी शाहूवाडी तालुका आणि जुना बुधवार पेठेतील नागरिकांनी व ग्रामस्थांनी त्यांचे अंत्यदर्शन घेतले. यानंतर पंचगंगा स्मशानभूमीत त्यांच्यावर अंत्यसंस्कार करण्यात आले.