कोल्हापूर : तिसंगी (ता. गगनबावडा) येथील जंगलात सांबराची शिकार केलेल्या पाचजणांवर गगनबावडा वनविभागाने कारवाई केली. घटनास्थळावरून तिघाजणांना ताब्यात घेतले तर उर्वरित पसार झालेल्या दोघाजणांना वनविभागाच्या कर्मचाऱ्यांनी रात्रीउशिरा ताब्यात घेतले.
रविवारी दुपारी निवडे गावातील पाच जणांनी तिसंगी येथील वनक्षेत्राच्या हद्दीतील मीटर माळ येथे मादी जातीच्या सांबराची शिकार केली. यावेळी वनविभागाचे अधिकारी व कर्मचारी यांनीघटनास्थळी धाड टाकून तिघांना ताब्यात घेतले. यात पाच शिकाऱ्यापैकी दोघे बंदुक व शस्त्रासह पसार झाले. पसार झालेल्या उर्वरित दोघांना रविवारी रात्री उशिरा वनविभागाच्या कर्मचाऱ्यांनी ताब्यात घेतले.
मादी जातीच्या सांबराची शिकार करणाऱ्या सुभाष बापू पाटील, विठ्ठल कोंडीबा पाटील, जालिंदर कृष्णा पाटील, पांडुरंग बाबू पाटील संजय लहू पाटील सर्वजण (रा. निवडे) या पाचजणांवर गुन्हा दाखल झाला आहे.
ही कारवाई उपवनसंरक्षक जी. गुरुप्रसाद यांच्या मार्गदर्शनाखाली सहाय्यक वनसंरक्षक कमलेश पाटील, गगनबावडा वनक्षेत्रपाल प्रियांका भवार, निवडे वनपाल संभाजी चरापले, वनरक्षक ओंकार भोसले, प्रकाश खाडे, नितीन शिंदे, वनमजूर धोंडीराम नाकाडे, दादू पाटील, मुबारक नाकाडे, नाथा कांबळे यांनी केली.