कोल्हापूर : गुंतवणुकीवर दरमहा १० टक्के घसघशीत परतावा देण्याचे खोटे आमिष दाखवून गुंतवणूकदारांची तब्बल ९८ लाख ९६ हजार रुपयांची फसवणूक करणाऱ्या 'लाईफमार्क रियल इस्टेट ॲन्ड डेव्हलपर्स प्रा. लि.' कंपनीच्या मुख्य संचालकाला स्थानिक गुन्हे अन्वेषण शाखेने अखेर बेड्या ठोकल्या आहेत. गुन्हा दाखल झाल्यापासून फरार असलेला मुख्य आरोपी स्वतःचे नाव बदलून अत्यंत चलाखीने राहत होता, मात्र पोलिसांनी त्याला शिताफीने जेरबंद केले आहे.  

▪️​घसघशीत परताव्याचे आमिष आणि ९८ लाखांची फसवणूक: सन २०२१ ते २०२३ या कालावधीत वैभव वामन जोशी व त्याच्या साथीदारांनी कंपनीत गुंतवणूक केल्यास दरमहा १० टक्के परतावा देण्याचे आमिष दाखवून ९८ लाख ९६ हजार रुपयांच्या ठेवी उकळल्या आणि नागरिकांची फसवणूक केली. याप्रकरणी शाहूपुरी पोलीस ठाण्यात गुन्हा दाखल करण्यात आला होता.  

▪️​नाव बदलून पोलिसांना चकवा देण्याचा प्रयत्न: गुन्हा दाखल झाल्यापासून मुख्य आरोपी वैभव जोशी हा फरार होता. त्याने पाचगाव येथील राहते घर विकून आपले नाव बदलून 'वैभव पाटील' या नावाने नवीन ठिकाणी बस्तान मांडले होते आणि तो पोलिसांना सतत चकवा देत होता.  

▪️​पोलिसांचा यशस्वी सापळा: पोलीस अधीक्षक  नीलोत्पल आणि स्थानिक गुन्हे अन्वेषण शाखेचे पोलीस निरीक्षक सुशांत चव्हाण यांच्या मार्गदर्शनाखाली समांतर तपास सुरू करण्यात आला. मुख्य आरोपी उदयमनगर येथे येणार असल्याची खात्रीशीर माहिती मिळताच तपास पथकाने सापळा रचून त्यास ताब्यात घेतले. 
 
▪️​संचालकासह साथीदारही अटकेत: मुख्य सूत्रधार वैभव वामन जोशी उर्फ वैभव वामन पाटील (वय ३२, रा. शांतीनगर, पाचगाव) याच्यासह त्याचा साथीदार रुपेश दत्ता गायकवाड (वय ३५, रा. माळवाडी, पाचगाव) यालाही पाचगाव येथून ताब्यात घेण्यात आले आहे. पुढील तपासासाठी दोन्ही आरोपींना शाहूपुरी पोलीस ठाण्याच्या ताब्यात देण्यात आले आहे.