नवी दिल्ली : केंद्र सरकारशी चर्चा सुरू असतानाच आज शेतकऱ्यांनी दिल्लीकडे मोर्चाची हाक दिली . युनायटेड किसान मोर्चा (गैर-राजकीय) च्या सिद्धूपूर गटाने दिल्लीकडे मोर्चा काढण्याच्या आवाहनावरून हरियाणाला लागून असलेल्या शंभू आणि खनौरी सीमेवर दिवसभर तणावपूर्ण परिस्थिती होती. जिल्हा प्रशासनाने शेतकऱ्यांची केंद्रीय मंत्र्यांशी चर्चा करून घेतली. दरम्यान, शेतकऱ्याच्या मृत्यूची बातमी मिळताच शेतकरी नेते जगजित सिंग डल्लेवाल यांनी परिस्थितीचा आढावा घेतल्यानंतरच पुढील रणनीती ठरवणार असल्याचे सांगितले. किसान मजदूर संघटनेचे सरचिटणीस सर्वनसिंग पंढेर यांनी सांगितले की, शेतकऱ्यांचा दिल्लीकडे निघणारा मोर्चा दोन दिवसांसाठी पुढे ढकलण्यात येणार आहे.
पंजाब आणि हरियाणाला जोडणाऱ्या खनौरी सीमेवर शेतकऱ्यांनी ठाण मांडलं आहे. खनौरी सीमेवर शेतकऱ्यांनी मोठ्या प्रमाणात चारा आणला आहे. शेतकरी चाऱ्यामध्ये मिरची पावडर टाकून आग लावत आहेत. शेतकऱ्यांनी चाऱ्याला आग लावल्यानंतर सर्वत्र धूर पसरत आहे. या धूराचा त्रास पोलिसांना होताना दिसत आहे.
शेतकरी नेते जगजित सिंग डल्लेवाल यांना राजिंद्र रुग्णालयात दाखल करण्यात आले आहे. त्याचवेळी तरुण शेतकऱ्याच्या मृत्यूनंतर जगजित सिंग डल्लेवाल यांनी केंद्रीय मंत्री अर्जुन मुंडा यांच्या प्रस्तावानंतर जिल्हा प्रशासन अधिकाऱ्यांसोबत सुरू असलेली बैठक सोडून दिली होती. मात्र, आता दिल्ली चलो आंदोलन दोन दिवसांसाठी स्थगित करण्यात आले आहे.
शेतकरी नेते सर्वनसिंह पंढेर म्हणाले की, शेतकऱ्यांचा दिल्ली चलो मोर्चा दोन दिवसांसाठी पुढे ढकलण्यात आला आहे. शुक्रवारी संध्याकाळी पुढील रणनीती ठरवली जाईल, असे ते म्हणाले. दिल्लीकडे कूच करण्यात थोडा विराम दिल्यानंतर, तरुण शेतकरी या निर्णयावर खूश नव्हते आणि परत जाऊ लागले.