कोल्हापूर: श्री क्षेत्र जोतिबा (वाडी रत्नागिरी) येथे होणाऱ्या चैत्र पौर्णिमा यात्रेच्या निमित्ताने भाविकांची होणारी प्रचंड गर्दी आणि वाहतूक कोंडी टाळण्यासाठी कोल्हापूर शहर वाहतूक नियंत्रण शाखेने विशेष नियमावली जाहीर केली आहे. दिनांक ३० मार्च ते १ एप्रिल २०२६ या कालावधीत हे नियम लागू राहतील. डोंगरावरील मर्यादित पार्किंग आणि भौगोलिक परिस्थिती विचारात घेऊन पोलीस प्रशासनाने 'एकेरी वाहतूक' आणि 'नो पार्किंग' क्षेत्रांचे नियोजन केले असून भाविकांनी प्रशासनाला सहकार्य करण्याचे आवाहन केले आहे.

प्रशासनाने दिलेल्या सूचनेनुसार, ३० मार्च २०२६ रोजी रात्री ८:०० वाजेपासून मालवाहू ट्रक, जड वाहने, तीनचाकी रिक्षा आणि दोन ट्रेलर असलेल्या ट्रॅक्टरना जोतिबा डोंगरावर जाण्यास केर्ली, कुशिरे आणि वाघबीळ या नाकाबंदीच्या ठिकाणावरून मज्जाव करण्यात आला आहे. तसेच, १ एप्रिल रोजी यात्रेचा मुख्य दिवस असल्याने सकाळी ५:०० वाजेपासून सर्व दुचाकी वाहनांना जोतिबा डोंगरावर दानेवाडी क्रॉसिंग, जुने आंब्याचे झाड आणि गिरोली फाटा येथून प्रवेश बंद करण्यात आला आहे.

डोंगरावरील पार्किंगची जागा पूर्ण भरल्यास भाविकांना आपली वाहने डोंगराच्या पायथ्याशी असलेल्या नियोजित ठिकाणी पार्क करावी लागतील. गिरोली फाटा मार्गे येणाऱ्या चारचाकी वाहनांसाठी यमाई वळण, निलगिरी बाग, लादे मळा आणि श्रावणी हॉटेल परिसर अशा १७ ठिकाणी पार्किंगची सोय आहे. केर्ली फाटा मार्गे येणाऱ्या वाहनांसाठी जुने एस.टी. स्टँड, पिराचा कडा आणि तोरणाई कडा येथे पार्किंग व्यवस्था केली आहे. महत्त्वाचे म्हणजे, पायथ्याशी वाहने पार्क करणाऱ्या भाविकांसाठी प्रशासनाने डोंगरावर जाण्या-येण्यासाठी 'मोफत' एस.टी. आणि के.एम.टी. बसेसची सोय उपलब्ध करून दिली आहे.

दर्शन घेऊन परतणाऱ्या भाविकांसाठी परतीचा मार्गही निश्चित करण्यात आला आहे. भाविकांनी गिरोली किंवा केर्ली मार्गे परत जावे. १ एप्रिल रोजी सायंकाळी ५:०० वाजल्यानंतर यात्रेची गर्दी वाढण्याची शक्यता असल्याने, केर्ली फाटा आणि गिरोली गावचा टी-पॉइंट येथून जोतिबा डोंगराकडे जाणारा रस्ता सर्व प्रकारच्या वाहनांसाठी पूर्णपणे बंद केला जाईल. पोलीस निरीक्षक नंदकुमार मोरे यांनी स्पष्ट केले आहे की, वाहतुकीची स्थिती पाहून नियमांमध्ये ऐनवेळी बदल करण्याचे अधिकार प्रशासनाकडे राहतील. भाविकांनी रस्त्यावर कुठेही वाहने उभी न करता केवळ अधिकृत पार्किंगचाच वापर करावा.