कोल्हापूर : एसटी बसमध्ये चढताना प्रवाशांच्या गर्दीचा फायदा घेऊन दागिने लंपास करणाऱ्या एका सराईत महिला चोरटीला अटक करण्यात स्थानिक गुन्हे अन्वेषण शाखेला यश आले आहे. पोलिसांनी या महिलेकडून चोरीच्या दोन गुन्ह्यांतील तब्बल ४ लाख ७४ हजार ९०० रुपये किमतीचे सोन्याचे दागिने हस्तगत केले आहेत.

कागल तालुक्यातील मुदाळतिठ्ठा येथे १७ एप्रिल २०२६ रोजी बसमध्ये चढत असताना एका ज्येष्ठ महिला फिर्यादीची पर्स अज्ञात चोरट्याने लांबवली होती. या घटनेचा तपास करत असताना पोलीस उपनिरीक्षक जालिंदर जाधव आणि त्यांच्या पथकाला माहिती मिळाली की, एक महिला चोरीचे दागिने विकण्यासाठी हुपरी येथील एका सुतगिरणीजवळ येणार आहे. मिळालेल्या माहितीनुसार पोलिसांनी सापळा रचून कामिना प्रकाश चौगुले (वय ४०, रा. शाहूनगर, कागल) या महिलेला ताब्यात घेतले. तिची झडती घेतली असता, तिच्याकडे ४०.५२ ग्रॅम वजनाचे सोन्याचे दागिने (एक मोहनमाळ व मंगळसूत्र) सापडले.

संबंधित महिला आरोपीने मुरगूड पोलीस ठाण्यातील चोरीच्या दोन गुन्ह्यांची कबुली दिली आहे. कोल्हापूरचे पोलीस अधीक्षक  नीलोत्पल आणि अपर पोलीस अधीक्षक  बी. धीरजकुमार यांच्या मार्गदर्शनाखाली पोलीस निरीक्षक सुशांत चव्हाण व त्यांच्या पथकाने ही यशस्वी कारवाई केली. आरोपी महिलेला मुद्देमालासह पुढील कारवाईसाठी मुरगूड पोलिसांच्या हवाली करण्यात आले आहे.