शिरोळ : रुग्णांना उपचारासाठी तालुक्याबाहेर हेलपाटे मारावे लागू नयेत, दर्जेदार आरोग्य सुविधा त्यांच्या दारातच उपलब्ध व्हाव्यात, हा माझा कायम प्रयत्न राहिला आहे. महाडायलिसिस सेवा सुरू झाल्याने शिरोळ तालुक्यातील किडनी रुग्णांना मोठा दिलासा मिळणार असून, आरोग्य सेवेत हा एक महत्त्वाचा टप्पा आहे, असे प्रतिपादन आमदार राजेंद्र पाटील-यड्रावकर यांनी केले. सार्वजनिक आरोग्य विभाग आणि एच.एल.एल. लाईफकेअर लिमिटेड यांच्या संयुक्त विद्यमाने शिरोळ ग्रामीण रुग्णालयात सुरू झालेल्या मोफत महाडायलिसिस सेवेच्या लोकार्पण प्रसंगी ते बोलत होते.या महत्त्वपूर्ण आरोग्य सेवेचे उद्घाटन आमदार राजेंद्र पाटील-यड्रावकर यांच्या हस्ते करण्यात आले. 

यावेळी आमदार यड्रावकर म्हणाले की, राज्य शासनाच्या माध्यमातून शिरोळ तालुक्यात आरोग्य सुविधांचे जाळे अधिक सक्षम करण्यासाठी सातत्याने प्रयत्न सुरू आहेत. वाढती लोकसंख्या आणि रुग्णसंख्या लक्षात घेऊन ग्रामीण भागातच आधुनिक उपचार सुविधा उपलब्ध करून देण्यावर शासनाचा भर आहे. शिरोळ तालुका भविष्यात 'मेडिकल हब' म्हणून विकसित करण्याच्या दृष्टीने अनेक महत्त्वाचे निर्णय घेण्यात आले आहेत. कुरुंदवाड येथे स्वतंत्र महिला रुग्णालय, ग्रामीण रुग्णालयाचा विस्तार, नवीन प्राथमिक आरोग्य केंद्रे, उपकेंद्रे आणि इतर आरोग्यविषयक प्रकल्प मंजुरीच्या प्रक्रियेत असून, त्याचा लाभ संपूर्ण तालुक्याला होणार आहे.

महाडायलिसिस सेवा सुरू झाल्यामुळे आतापर्यंत डायलिसिससाठी कोल्हापूर, सांगली किंवा मिरज येथे जावे लागणाऱ्या रुग्णांचा वेळ, खर्च आणि मानसिक त्रास मोठ्या प्रमाणात कमी होणार आहे. विशेषतः आर्थिकदृष्ट्या दुर्बल रुग्णांसाठी ही मोफत सेवा जीवनदायी ठरणार आहे. स्थानिक स्तरावरच आधुनिक यंत्रणेद्वारे तज्ज्ञांच्या देखरेखीखाली उपचार मिळणार असल्याने रुग्णांचा आत्मविश्वास वाढणार असून त्यांच्या नातेवाईकांनाही मोठा आधार मिळणार आहे.

 यावेळी पंचायत समितीचे सभापती मिलिंद कुरणे, शिरोळ नगरपरिषदेच्या नगराध्यक्षा योगिता कांबळे, उपनगराध्यक्ष पृथ्वीराजसिंह यादव, उपसभापती मनीषा कदम, माजी नगराध्यक्ष अमरसिंह पाटील, पंचगंगेचे व्हा चेअरमन बाबा पाटील, पंचायत समिती सदस्य फजलेअली पटेल, विजयसिंह देशमुख, सुरज कांबळे, शिरोळचे तहसीलदार अनिलकुमार हेळकर, तालुका आरोग्य अधिकारी डॉ. पांडुरंग खटावकर, शिरोळ नगरपरिषदेचे मुख्याधिकारी डॉ. निशिकांत प्रचंडराव यांच्यासह पदाधिकारी उपस्थित होते. आभार ग्रामीण रुग्णालयाच्या वैद्यकीय अधीक्षक डॉ. उषा चोले यांनी मानले.