कोल्हापूर : कणेरी (ता. करवीर) येथील श्री सिद्धगिरी कृषी विज्ञान केंद्रामध्ये ‘तंत्रज्ञान स्त्रोत केंद्रा’चे उद्घाटन सिद्धगिरी मठाचे परम पूज्य अदृश्य काडसिद्धेश्वर स्वामीजी यांच्या हस्ते नुकतेच संपन्न झाले. या प्रसंगी वसंतराव नाईक मराठवाडा कृषी विद्यापीठाचे (परभणी) कुलगुरू डॉ. इंद्रमणी, संशोधन अभियंता डॉ. डी. डी. टेकाळे आणि पशु विज्ञान शास्त्रज्ञ डॉ. संदेश देशमुख यांची प्रमुख उपस्थिती होती. तसेच, द्वारका जुना अखाड्याचे जगद्गुरू कृष्णानंद देव गिरी यांनीही या कार्यक्रमाला विशेष उपस्थिती लावून मार्गदर्शन केले.

हे केंद्र भारतीय कृषी अनुसंधान परिषदेच्या (ICAR) अखिल भारतीय समन्वयित संशोधन प्रकल्पांतर्गत स्थापन करण्यात आले असून, याद्वारे पशुसंवर्धनासाठी यांत्रिकीकरण योजनेवर भर दिला जाणार आहे. बैलचलित आधुनिक तंत्रज्ञानाचा प्रसार करणे, हा या केंद्राचा मुख्य उद्देश आहे. उद्घाटनप्रसंगी कुलगुरू डॉ. इंद्रमणी यांनी शेतकऱ्यांशी संवाद साधताना कृषी क्षेत्रातील नव्या संशोधनाचा आणि तंत्रज्ञानाचा अवलंब करणे काळाची गरज असल्याचे प्रतिपादन केले. पारंपरिक शेतीला शाश्वत आणि आधुनिक बनवण्यासाठी हे केंद्र महत्त्वपूर्ण दुवा ठरेल, असा विश्वास यावेळी व्यक्त करण्यात आला.

वरिष्ठ शास्त्रज्ञ व प्रमुख डॉ. रवींद्र सिंह यांच्या मार्गदर्शनाखाली या कार्यक्रमाचे नेटके आयोजन करण्यात आले होते. या सोहळ्याला परिसरातील शेतकरी, कृषी विज्ञान केंद्रातील सर्व शास्त्रज्ञ आणि कर्मचारी मोठ्या संख्येने उपस्थित होते. या नवीन तंत्रज्ञान स्त्रोत केंद्रामुळे कोल्हापूर जिल्ह्यातील शेतकऱ्यांना आधुनिक कृषी औजारे आणि बैलचलित यंत्रांची माहिती एकाच छताखाली उपलब्ध होणार आहे.