कोल्हापूर : भारतीय जनता पार्टीच्या ‘सेवा अभियान’ अंतर्गत कोल्हापूर जिल्ह्यातील पदाधिकारी, कार्यकर्ते व सर्वसामान्य नागरिकांच्या विविध प्रलंबित प्रश्नांबाबतची निवेदने शासनापर्यंत पोहोचविण्याचा उपक्रम सुरू आहे. भाजपा महाराष्ट्र प्रदेशाध्यक्ष आमदार रविंद्र दादा चव्हाण यांच्या मार्गदर्शनाखाली या अभियानाचे आयोजन करण्यात आले आहे.

या अभियानांतर्गत महाराष्ट्र राज्याचे महसूल मंत्री तथा नागपूर व अमरावती जिल्ह्याचे पालकमंत्री  चंद्रशेखर बावनकुळे हे रविवारी, दि. २३ ऑगस्ट २०२६ रोजी दुपारी ३.०० वाजता कोल्हापुरात नागरिकांची निवेदने स्वीकारणार आहेत.

हा कार्यक्रम जिल्हाधिकारी कार्यालय, कोल्हापूर येथे होणार आहे. नागरिकांनी आपल्या विविध प्रश्नांबाबतची लेखी निवेदने घेऊन उपस्थित राहावे. निवेदन सादर करताना हार, पुष्पगुच्छ किंवा इतर सत्कार साहित्य आणू नये, असे आवाहन करण्यात आले आहे.

कोल्हापूर जिल्ह्यातील नागरिक, भाजपा पदाधिकारी व कार्यकर्त्यांनी आपल्या परिसरातील प्रलंबित प्रश्नांची निवेदने या उपक्रमाद्वारे सादर करून ‘सेवा अभियानात’ सहभागी व्हावे, असे आवाहन भाजपा कोल्हापूरच्या वतीने करण्यात आले आहे.