◼️उच्च न्यायालयाच्या आदेशानुसार कोल्हापूर महापालिकेची कारवाई; अतिक्रमणधारकांनी साहित्य स्वतःहून हटविण्याचे आवाहन

कोल्हापूर : कोल्हापूर महानगरपालिका हद्दीतील प्रार्थनास्थळे, शैक्षणिक संस्था तसेच सर्वसाधारण रुग्णालयांच्या परिसरातील फेरीवाला अतिक्रमणाबाबत मा.मुंबई उच्च न्यायालयाच्या कोल्हापूर खंडपीठाने दि.18 ऑगस्ट 2026 रोजी आदेश पारित केला आहे. या आदेशानुसार प्रार्थनास्थळे, शैक्षणिक संस्था व सर्वसाधारण रुग्णालयांपासून 100 मीटरच्या परिसरात हॉकिंग अथवा फेरीवाला व्यवसायास परवानगी देणे योग्य नसल्याचे नमूद करण्यात आले आहे.

   या पार्श्वभूमीवर महापालिका हद्दीतील संबंधित परिसरात अतिक्रमण करून व्यवसाय करणाऱ्या फेरीवाले व व्यावसायिकांनी आपले अतिक्रमण तसेच व्यवसायाचे साहित्य स्वतःहून तात्काळ हटवावे असे आवाहन महानगरपालिका प्रशासनाने केले आहे. संबंधितांनी अतिक्रमण स्वतःहून न हटविल्यास महानगरपालिकेमार्फत सदर अतिक्रमणे हटविण्याची कारवाई करण्यात येणार आहे.

  महानगरपालिका महासभेच्या ठरावानुसार कारवाईदरम्यान हटविण्यात आलेले अथवा जप्त करण्यात आलेले व्यवसायाचे साहित्य संबंधितांना परत करण्यात येणार नाही. त्यामुळे फेरीवाले व व्यावसायिकांनी याची गांभीर्याने नोंद घेऊन प्रशासनास सहकार्य करावे.

  शहरातील नागरिकांनी तसेच संबंधित फेरीवाले व व्यावसायिकांनी मा. उच्च न्यायालयाच्या आदेशाची माहिती घेऊन त्याचे पालन करावे आणि कोल्हापूर महानगरपालिका प्रशासनास सहकार्य करावे असे आवाहन महानगरपालिकेच्यावतीने करण्यात आले आहे.