मुंबई : धुळ्यात लोकसभा निवडणुकीच्या उमेदवारी अर्जाच्या छाननीत वंचित आघाडीचे उमेदवार अब्दुर्र रहमान यांचा अर्ज लाभाच्या पदाच्या कारणावरून अवैध करण्यात आला आहे. एकूण 30 उमेदवारांपैकी 22 उमेदवारांचे वैध ठरले तर 8 उमेदवारांचे अर्ज अवैध ठरल्याची माहिती जिल्हाधिकारी तथा जिल्हा निवडणूक निर्णय अधिकारी अभिनव गोयल यांनी दिली आहे.
धुळे लोकसभा मतदार संघ निवडणूकीसाठी दाखल झालेल्या उमेदवारी अर्जाची छाननी प्रक्रिया आज येथील नवीन नियोजन सभागृहात पार पडली.यावेळी उपस्थितांच्या समोर दाखल अर्जाची छाननी करण्यात आली. धुळे लोकसभा मतदार संघासाठी नामनिर्देशनपत्र दाखल केलेल्या एकूण 30 उमेदवारांपैकी 22 उमेदवारांचे वैध ठरले तर 8 उमेदवारांचे अर्ज अवैध ठरले. यात वंचित बहुजन आघाडीचे आघाडीला फटका बसला आहे. आघाडीचे उमेदवार अब्दुर्र रहमान यांचा अर्ज बाद ठरला.
या संदर्भात त्यांनी प्रतिक्रिया देत असताना निवडणूक यंत्रणेने त्यांच्याकडे असलेल्या लाभाच्या पदा संदर्भातील कारणावरून अर्ज बाद केल्याचे म्हटले आहे. सध्या आपण कोणत्याही लाभाच्या पदावर नसून कोणताही वेतन स्वरूपाचा लाभ घेत नसल्याचा दावा त्यांनी केला. या व्यतिरिक्त उमेदवारी अर्ज परिपूर्ण असल्याचा दावा देखील त्यांनी केला. त्यांचा सेवानिवृत्तीचा विषय वेगळा असून ही बाब न्यायप्रविष्ट आहे.