जम्मू : काँग्रेसचे राष्ट्रीय अध्यक्ष मल्लिकार्जुन खरगे जम्मूमध्ये रविवारी भाषण देत असताना अचानक स्टेजवर बेशुद्ध पडले. जसरोटा विधानसभा मतदारसंघातील बारनोटी येथे ते भाषण करत होते. मंचावर पडल्याने त्यांना काही मिनिटे भाषण थांबवावे लागले. यानंतर त्यांनी काही मिनिटे बसून भाषण केले. मी ८२ वर्षांचा आहे लगेच मरणार नाही. मोदींना सत्तेवरून हटवल्याशिवाय मी मरणार नाही, असे म्हणत त्यांनी पंतप्रधान मोदींवर हल्लाबोल केला.
खरगे म्हणाले की, केंद्र सरकारला जम्मू- काश्मीरमध्ये निवडणुका घेण्याची कधीच इच्छा नव्हती. त्यांना निवडणूक हवी असती तर एक-दोन वर्षात निवडणुका झाल्या असत्या. सर्वोच्च न्यायालयाच्या आदेशानंतर त्यांनी निवडणुकीची तयारी सुरू केली. त्यांना लेफ्टनंट गव्हर्नरच्या माध्यमातून रिमोट- नियंत्रित सरकार चालवायचे होते.
पंतप्रधान मोदींनी गेल्या १० वर्षात भारतातील युवकांना काहीही दिले नाही. १० वर्षांत तुमची समृद्धी परत आणू शकत नाही, अशा व्यक्तीवर तुम्ही विश्वास ठेवू शकता का?. या रॅलीमध्ये मोठ्या प्रमाणे काँग्रेसचे कार्यकर्ते उपस्थित होते.