कोल्हापूर : किल्ले विशाळगड परिसरातील दंगलग्रस्त गजापूर गावास खासदार श्रीमंत शाहू छत्रपती महाराज, आमदार सतेज पाटील यांनी भेट देऊन पाहणी केली. यावेळी स्थानिकांका आपल्या व्यथा मांडताना अश्रू अनावर झाले. त्यांच्याशी संवाद साधला तसेच जीवनावश्यक साहित्याचे वाटप करून त्यांना दिलासा दिला.
किल्ले विशाळगड येथील अतिक्रमणाशी कसलाही संबंध नसलेल्या गजापूर गावात घडलेली हिंसाचाराची घटना अतिशय दुर्दैवी असून संयमी कोल्हापूरकर धर्मांधतेच्या राजकारणापासून दूर राहून बंधुत्वाची भावना जोपासत संपूर्ण देशासमोर अनुकरणीय आदर्श ठेवतील याची खात्री आहे. अशी भावना श्रीमंत शाहू छत्रपती महाराज, आमदार सतेज पाटील यांनी व्यक्त केली.
याप्रसंगी माजी आमदार मालोजीराजे छत्रपती, सत्यजित पाटील सरुडकर राष्ट्रवादीचे व्ही.बी. पाटील, आर.के. पोवार, मराठा महासंघाचे वसंतराव मुळीक, मुस्लिम बोर्डिंगचे गणी आजरेकर, कादर मलबारी, भारतीताई पोवार यांच्यासह इंडिया आघाडीतील घटक पक्षांचे पदाधिकारी उपस्थित होते.