कोल्हापूर : महाराष्ट्र राज्याच्या ऊर्जा क्षेत्रात स्वावलंबन आणि वृद्धी आणण्याच्या दृष्टीने आज एक ऐतिहासिक पाऊल उचलण्यात आले आहे. राज्याचा जलसंपदा विभाग आणि तात्यासाहेब कोरे वारणा नवशक्ती निर्माण संस्था यांच्यात मुख्यमंत्री देवेंद्र फडणवीस यांच्या उपस्थितीत तीन महत्त्वाच्या  जलविद्युत प्रकल्पांसाठी सामंजस्य करार (MOU) करण्यात आला. या प्रकल्पांच्या माध्यमातून सुमारे ५,२०० कोटी रुपयांची मोठी गुंतवणूक राज्यात होणार असून, ऊर्जा साठवणुकीच्या बाबतीत महाराष्ट्र अधिक सक्षम होणार आहे.

▪️ऊर्जा साठवणूक आणि ग्रीड स्थिरता
या कराराप्रसंगी बोलताना मुख्यमंत्री देवेंद्र फडणवीस यांनी विश्वास व्यक्त केला की, हा प्रकल्प महाराष्ट्राच्या ऊर्जा क्षमतेत वाढ करण्यासाठी एक महत्त्वाचा टप्पा ठरेल. या प्रकल्पांमुळे केवळ वीज निर्मितीच होणार नाही, तर कमी खर्चात मोठ्या प्रमाणावर ऊर्जा साठवणूक करणे शक्य होईल. यामुळे राष्ट्रीय ग्रीडची स्थिरता राखण्याची क्षमता राज्यात निर्माण होणार असून, भविष्यातील ऊर्जेची गरज भागवण्यासाठी हे प्रकल्प कणा ठरतील, असेही त्यांनी नमूद केले.

▪️कोल्हापूर आणि सिंधुदुर्गाला लाभ
तात्यासाहेब कोरे वारणा नवशक्ती निर्माण संस्थेच्या माध्यमातून हे तीनही प्रकल्प कोल्हापूर जिल्ह्यातील शाहूवाडी आणि सिंधुदुर्ग जिल्ह्यात उभारले जाणार आहेत. या प्रकल्पांमध्ये एकूण ५,१९९ कोटी रुपयांची गुंतवणूक अपेक्षित असून, त्यातून १,१०० मेगावॅट इतकी मोठी वीज निर्मिती क्षमता प्रस्थापित केली जाईल. पश्चिम महाराष्ट्रातील औद्योगिक आणि सामाजिक विकासाला या गुंतवणुकीमुळे मोठी चालना मिळण्याची शक्यता वर्तवण्यात येत आहे.

▪️रोजगार निर्मितीवर भर
या महत्त्वाकांक्षी प्रकल्पांमुळे केवळ राज्याच्या वीज प्रश्नावर मार्ग निघणार नाही, तर मोठ्या प्रमाणावर रोजगाराच्या संधीही उपलब्ध होणार आहेत. या तीनही जलविद्युत प्रकल्पांच्या उभारणीतून आणि संचालनातून सुमारे १,१०० मनुष्यबळ रोजगार निर्मिती होईल, असा अंदाज वर्तवण्यात आला आहे. स्थानिक पातळीवर रोजगाराच्या नवीन संधी निर्माण होणार असल्याने कोल्हापूर आणि सिंधुदुर्ग जिल्ह्यातील तरुणांसाठी हा प्रकल्प दिलासादायक ठरणार आहे.