कोल्हापूर : आंतरराज्यीय संघटित गुन्हेगारी विश्वात थरकाप उडवणारी मोठी कारवाई करत, कुख्यात बिष्णोई टोळीचा प्रमुख श्यामलाल गोवर्धनराम पुनिया आणि त्याचा साथीदार श्रीराम मांजु यांना कोल्हापूरच्या स्थानिक गुन्हे अन्वेषण शाखेने अत्यंत धाडसी व यशस्वी कारवाई करत जेरबंद केले आहे.  

​अटक करण्यात आलेला श्यामलाल गोवर्धनराम पुनिया उर्फ बिष्णोई हा '००७' या आंतरराज्यीय संघटित गुन्हे टोळीचा प्रमुख असून, त्याच्याविरुद्ध खुनाचे प्रयत्न, दरोडे आणि बेकायदेशीर शस्त्र बाळगण्यासारखे तब्बल १७ गंभीर गुन्हे दाखल आहेत. विशेष म्हणजे, त्याने सन २०२० मध्ये कोल्हापुरातील किणी टोल नाक्यावर पोलिसांच्या दिशेने फायरींग केले होते. दुसरा आरोपी श्रीराम मांजु उर्फ पाचाराम बिष्णोई याच्यावर खुनाचा प्रयत्न, दरोडा, बलात्कार, विनयभंग आणि सरकारी कामात अडथळा आणण्यासारखे तब्बल २६ गंभीर गुन्हे दाखल आहेत.  

​हे दोन्ही कुख्यात गुन्हेगार कोल्हापूर जिल्हा सत्र न्यायालयात कामकाजासाठी येणार असल्याची गुप्त माहिती राजस्थान पोलीस व पिंजर-चिंचवड आयुक्तालयाकडून कोल्हापूर पोलिसांना मिळाली. त्यानुसार पोलीस अधीक्षक नीलोत्पल यांच्या मार्गदर्शनाखाली स्थानिक गुन्हे अन्वेषण शाखेचे पोलीस निरीक्षक सुशांत चव्हाण आणि त्यांच्या पथकाने सत्र न्यायालयाच्या परिसरात अत्यंत गोपनियरीत्या सापळा रचला.  
​ न्यायालयाच्या आवारातील पार्किंगमधून बाहेर पडताना पोलिसांना पाहताच दोन्ही आरोपींनी पांढऱ्या रंगाच्या ब्रिझा कारमधून पळून जाण्याचा प्रयत्न केला. मात्र, पोलिसांनी मुख्य गेट बंद करून आणि प्रसंगावधान दाखवत त्यांना अवघ्या काही मिनिटांतच मुसक्या आवळल्या.  
​
 आरोपी श्रीराम मांजु यास पुढील तपासकामी पिंपरी चिंचवड आयुक्तालयाच्या पथकाच्या ताब्यात देण्यात आले आहे, तर श्यामलाल पुनिया याला तातडीने पुढील कारवाईसाठी राजस्थान पोलिसांच्या स्वाधीन करण्यात येत आहे.