नवी दिल्ली : देशातील विविध राज्यांमध्ये सुरू असलेल्या निवडणूक प्रचाराचा धडाका आज थांबला आहे. पश्चिम बंगालमधील पहिल्या टप्प्यातील आणि तामिळनाडूतील सर्व जागांसाठी गुरुवारी मतदान होणार असून, आज या दोन्ही राज्यांमधील प्रचाराच्या तोफा थंडावल्या आहेत.

तामिळनाडू विधानसभेच्या एकूण २३४ जागांसाठी एकाच टप्प्यात मतदान पार पडणार आहे. दुसरीकडे, पश्चिम बंगालमध्ये पहिल्या टप्प्यात १५२ मतदारसंघांमध्ये मतदान होईल. या दोन्ही राज्यांमध्ये मिळून एकूण १,४७८ उमेदवार आपले नशीब अजमावत आहेत. प्रचाराच्या शेवटच्या दिवसापर्यंत सर्वच राजकीय पक्षांच्या दिग्गज नेत्यांनी मतदारांना आकर्षित करण्यासाठी सभा आणि रॅलींचा धडाका लावला होता.

🔹महाराष्ट्रात बारामती आणि राहुरीवर लक्ष
राज्यातील विधानसभा पोटनिवडणुकीकडेही सर्वांचे लक्ष लागले आहे. बारामती आणि राहुरी विधानसभा पोटनिवडणुकीसाठी आज प्रचाराचा शेवटचा दिवस होता. या दोन्ही मतदारसंघांतील उमेदवारांनी आणि पक्षांनी मतदारांपर्यंत पोहोचण्यासाठी आपली पूर्ण शक्ती पणाला लावली आहे. आता सर्वांच्या नजरा गुरुवारी होणाऱ्या मतदानाकडे आणि त्यानंतर लागणाऱ्या निकालाकडे लागल्या आहेत.