कोल्हापूर : हातकणंगले तालुक्यातील टोप आणि कासारवाडी येथील बेकायदेशीर रित्या सुरू असलेल्या ३७ क्रशर व्यवसाय सिल करुन तहसीलदार सुशीलकुमार बेल्हेकर यांच्या मार्गदर्शनाखाली पथकाने गुरुवारी दिवसभर धडक कारवाई केली.  बुधवार दिनांक ९ जुलै रोजी काँग्रेसचे विधानपरिषदेतील गटनेते आमदार सतेज पाटील यांनी टोप - कासारवाडी परिसरातील अवैध उत्खनन व शासनाकडे जमा होणारा महसूल याबाबतचा विधान परिषदेत तारांकीत प्रश्न विधान परिषदेत उपस्थित केला होता. यावर महसूल मंत्री चंद्रशेखर बावनकुळे यांनी शासनाचा महसूल चुकवणाऱ्यांवर कारवाई करणार असल्याचे सांगितले होते. टोप कासारवाडी येथील खाण व क्रशर व्यवसाय चर्चेच्या केंद्रस्थानी आहे.

मंत्री बावनकुळे यांनी अनाधिकृत उत्खनन करणाऱ्यां दगड खाणी, क्रशरवर कारवाई करणार असल्याची प्रसिद्ध झालेली बातमी वरुन हातकणंगले तहसीलदार सुशीलकुमार बेल्हेकर यांच्या मार्गदर्शनाखाली मंडल अधिकारी सिमा मोरया, पांडुरंग धुमाळ, अमित लाड, सचिन कांबळे, अमोल कोटे यांच्या पथकाने धडक क्रशर सिल ची कारवाई सुरू केली आहे.

टोप व कासारवाडी परिसरात एकूण ४६ क्रशर आहेत. ज्या क्रशर व्यावसायिकांशी ट्रेडींग लायसन्स परवाना, प्रदुषण महामंडळाचे पत्र परवानगी घेतली नाही, राॅयल्टी भरलेली नाही अशा व्यवसायांवर महसूल विभागाने कारवाई सुरू केली आहे.

ट्रेडिंग परवाना सक्तीचा केला आहे. पण, टोप आणि कासारवाडी येथील ४६ पैकी ३७ व्यावसायिकांनी ट्रेडिंग परवानाच काढलेला नाही. तसेच कित्येकांच्याकडे प्रदुषण महामंडळाचे परवानगी पत्रच नाही. दगड उत्खनन करणाऱ्या अनेकांनी राॅयल्टी भरलेली नाही, कित्येकजण विनापरवाना, विना राॅयल्टी उत्खनन करत आहेत अशांवर कारवाई सुरू करुन हे क्रशर सिल केले आहेत.

तहसीलदार सुशीलकुमार बेल्हेकर यांनी गुरुवारी सकाळी दहा वाजता मंडलाधिकारी तलाठी कोतवाल यांना विनापरवाना आणि अनाधिकृत उत्खनन करणाऱ्यांच्यावर कारवाई करावी असे आदेश दिले त्यानुसार गुरुवारी दिवसभर टोप मधील ३७ क्रशरवर कारवाई करण्यात आली.

🔵 अनधिकृत दगड खाण व क्रशरवर प्रशासनाने कारवाई केल्यानंतर मोठी हालचाल पाहायला मिळाल्या. कारवाई टाळण्यासाठी संबंधितांनी डंपर, जेसीबी, पोकलेनसारखी अवजड यंत्रसामग्री इतरत्र हलवली. या धाडसी कारवाईमुळे परिसरातील अनधिकृत उत्खनन करणाऱ्यांचे धाबे दणाणले आहेत.

🔵 तहसीलदार यांच्या आदेशानुसार ज्या क्रेशर व्यावसायिकांच्या कडे ट्रेडिंग लायसन प्रदूषण महामंडळाचा परवाना बिगर शेती रॉयल्टी भरलेली नाही अशा व्यवसायाकांच्यावर कारवाई करण्यात आली असून टोप मधील ४६ पैकी ३७ व्यावसायिक परवाना नाही तर ९ जणांच्या कडे परवाना आहे 
- सिमा मोरया (मंडल अधिकारी )