कोल्हापूर : राज्यातील शाळांमध्ये राष्ट्रीय शिक्षण धोरण 2020 च्या अनुषंगाने त्रिभाषा धोरण निश्चित करण्यासाठी मुख्यमंत्री महोदयांच्या निर्देशानुसार समिती गठीत करण्यात आली आहे. 

ही समिती व कामकाजाशी संबंधित अधिकारी, कर्मचारी हे शनिवार, दिनांक 1 नोव्हेंबर रोजी कोल्हापूर दौऱ्यावर येणार असून समितीच्या दौऱ्यामध्ये जिल्ह्यातील शाळांमध्ये त्रिभाषा सूत्र कोणत्या इयत्तेपासून, कशाप्रकारे लागू करावयाचे याबाबतचे धोरण निश्चित करण्याकरीता सामान्य नागरीक, भाषातज्ञ, विचारवंत, मराठी भाषेशी संबधित किंवा संलग्न शासकीय किंवा अशासकीय, खासगी संस्था यांचे अध्यक्ष, सदस्य, राजकीय पक्षांचे नेते, लोकप्रतिनिधी, प्राथमिक, माध्यमिक शिक्षक संघटना यांचे अध्यक्ष, सदस्य, पालक, शिक्षक संघटनांचे पदाधिकारी, आंदोलक इत्यादींसोबत संवाद साधणार आहेत.

समिती मध्ये डॉ. नरेंद्र जाधव, शिक्षणतज्ज्ञ, डॉ. सदानंद मोरे, माजी अध्यक्ष, भाषा सल्लागार समिती, डॉ. वामन केंद्रे, माजी संचालक, नॅशनल स्कूल ऑफ ड्रामा (NSD), डॉ. अपर्णा मॉरिस, शिक्षणतज्ज्ञ, पुणे, डॉ. सोनल कुलकर्णी- जोशी, भाषा विज्ञान प्रमुख, डेक्कन कॉलेज, पुणे, डॉ. मधुश्री  सावजी, शिक्षणतज्ज्ञ, छत्रपती संभाजीनगर,  डॉ. भूषण शुक्ल, बालमानसतज्ज्ञ, पुणे व संजय यादव, राज्य प्रकल्प संचालक, समग्र शिक्षा अभियान, मुंबई असणार आहेत.