कोल्हापूर : आगामी विधानसभा निवडणुका लढवण्याची तयारी आम आदमी पार्टीकडून सुरु करण्यात आली आहे. या पार्श्वभूमीवर आप कार्यकर्त्यांचा मेळावा प्रदेश कार्याध्यक्ष अजित फाटके पाटील यांच्या प्रमुख उपस्थितीत पार पडला. आगामी निवडणूक पक्षाने ताकदीने लढवावी, सर्व कार्यकर्ते यासाठी जोमाने कामाला लागतील असा सुर शाहू स्मारक येथे पार पडलेल्या मेळाव्यात निघाला.
शहरातील अनेक ज्वलंत प्रश्नांना सोडवण्याचे काम आप ने केले आहे. जिल्हातील उत्तर, दक्षिण, कागल, शिरोळ या जागांसाठी पक्षाकडे मागणी केलेली आहे. उत्तर मधून उमेदवारी दिल्यास ताकदीने लढणार असल्याचे आप चे प्रदेश संघटन सचिव संदीप देसाई यांनी सांगितले.
लोकसभा निवडणुकीत इंडिया आघाडीच्या माध्यमातून आम आदमी पार्टीने महाविकास आघाडीची भक्कम साथ दिली. त्यावेळी देशाचे संविधान वाचवणे ही प्राथमिकता होती. परंतु आता परिस्थिती बदलली आहे. येणारी विधानसभा पक्ष जोमाने लढवणार आहे. त्यासाठी राष्ट्रीय नेतृत्वासोबत चर्चा सुरु आहे. जेवढा प्रयत्न कार्यकर्ते म्हणून तुम्ही करणार नाही तेवढा प्रयत्न आम्ही तुमच्यासाठी करू, गरज पडल्यास महाविकास आघाडीच्या नाकावर टिचून विधानसभा लढवू असा इशारा प्रदेश कार्याध्यक्ष अजित फाटके पाटील यांनी कार्यकर्त्यांना दिला.
जिल्हाध्यक्ष अरुण गळतगे, उत्तम पाटील, सूरज सुर्वे, मोईन मोकाशी,समीर लतीफ, दुष्यंत माने, प्रसाद सुतार, विजय हेगडे, बबन कावडे यांची भाषणे झाली.
प्रास्ताविक अभिजित कांबळे, मोहसीन शेख यांनी सूत्रसंचालन केले, समीर लतीफ यांनी आभार मानले.