कोल्हापूर : इचलकरंजी विधानसभा मतदारसंघाचे आमदार प्रकाश आवाडे व जिल्हा परिषदेचे माजी सदस्य राहुल आवाडे यांनी केंद्रीय गृहमंत्री अमित शहा यांच्या प्रमुख उपस्थितीमध्ये भारतीय जनता पक्षात प्रवेश केला. विशेष म्हणजे, भाजपचे प्रदेश उपाध्यक्ष सुरेश हाळवणकर हे आवाडे पिता-पुत्रांना घेऊन स्टेजवर आले. या माध्यमातून भारतीय जनता पक्षात आवाडे यांच्या प्रवेशावरुन कसलेही मतभेद नाहीत हे दाखवून देत विकासाच्या नव्या अध्यायाला प्रारंभ झाल्याचे दिसून आले.
आगामी विधानसभा निवडणुकीत इचलकरंजी विधानसभा मतदारसंघातून राहुल आवाडे यांची उमेदवारी महायुतीकडून निश्चित मानली जात आहे. विद्यमान आमदार प्रकाश आवाडे यांनी आपण निवडणूक लढविणार नाही असे यापूर्वीच जाहीर केले आहे. त्यांचे पुत्र व जिल्हा परिषदेचे माजी सदस्य राहुल आवाडे हे विधानसभा निवडणुकीची तयारी करत आहेत. मात्र ते स्वतंत्र लढणार की भाजपात प्रवेश करणार या विषयी तर्कवितर्क लढविले जात होते. कारण भाजपाचे माजी आमदार सुरेश हाळवणकर हे देखील विधानसभेसाठी इच्छुक होते. यामुळे आवाडे यांचा भाजप प्रवेश लांबणीवर पडला होता. दरम्यान आगामी विधानसभा निवडणुकीच्या पार्श्वभूमीवर बुधवारत ता. २५ रोजी केंद्रीय गृहमंत्री अमित शहा यांच्या प्रमुख उपस्थितीत कोल्हापुरात पश्चिम महाराष्ट्रातील पदाधिकारी मेळावा झाला.
या मेळाव्यामध्ये केंद्रीय गृह व सहकार मंत्री अमित शाह यांनी आमदार प्रकाश आवाडे, मा. जिल्हा परिषद सदस्य डॉ. राहुल आवाडे यांच्या गळ्यात भाजपाचा स्कार्फ घालून, त्यांना पक्ष प्रवेश दिला. यावेळी उपमुख्यमंत्री देवेंद्र फडणवीस, उच्च व तंत्र शिक्षण मंत्री चंद्रकांत पाटील, भाजपा महाराष्ट्र प्रदेशाध्यक्ष चंद्रशेखर बावनकुळे, महाराष्ट्र भाजपा निवडणूक प्रभारी भूपेंद्रजी यादव , केंद्रीय मंत्री मुरलीधर मोहोळ, माजी केंद्रीय मंत्री रावसाहेब दानवे, खासदार धनंजय महाडिक, महाराष्ट्राचे कामगार मंत्री सुरेश खाडे, भाजपा प्रदेश उपाध्यक्ष सुरेश हाळवणकर, मोश्मी आवाडे यांच्यासह भाजपचे प्रमुख पदाधिकारी कार्यकर्ते मोठ्या संख्येने उपस्थित होते.